Castelá de nacemento e galega de adopción, Davinia Rico instalouse na Coruña en 2011, despois de estar vivindo “en millóns de sitios”. Unha decisión que tomou polo moito que lle gustaba a cidade e polo baleiro que había no ensino de técnicas circenses, que ela coñeceu en Inglaterra hai máis de dúas décadas, cando estaba a estudar arte dramática. “Por aquel entón, en España non se podían estudar e a min engancháronme. Tanto, que iso foi hai vinte anos e aínda non o deixei!”, conta Davinia Rico, cuxa especialidade son os aéreos e o seu amor, o trapecio. Porén, recoñece que nunca lle gustou o circo clásico —“nin sequera de pequena, e segue sen gustarme; eu só collo as súas técnicas e lévoas ás miñas creacións”— e que se namorou de Galicia cando veu traballar cun espectáculo.

Tras pasar por varias compañías, despois de colaborar con outras como a de Nelson Quinteiro e de ter a súa propia, coa que puxo en marcha A vida das tormentas, “un proxecto súper tolo que desenvolvemos cunha bolsa da Universidade da Coruña, que combinaba moitas disciplinas como as artes plásticas, a música experimental en directo e un vídeo con proxeccións”, Davinia decidiu abrir ZŌ, despois de dar clase noutras escolas.

Atopar o local adecuado foi clave. Situado na zona de Monte Alto, ten cinco metros de altura, “o espazo perfecto para a iniciación”. Afirma Davinia que, aínda que o alumnado infantil supera o adulto, “cada vez esperta máis interese nas persoas adultas e tivo moi boa acollida. A xente que vén e proba, engánchase”. E matiza que “che ten que gustar porque é moi duro, pero cando empezas a facelo enseguida te pos forte e iso tamén contribúe á súa popularidade, porque é perfecto para poñerse en forma facendo algo diferente. Ademais, axuda a coller elasticidade e a poñerse a proba a un mesmo, a superar retos”.

O curso desenvólvese con clases semanais de setembro a xuño, e inclúe formación e a creación de coreografías e de espectáculos. Tamén se celebran aniversarios temáticos moi especiais sobre o mundo do circo e no verán campamentos intensivos, aínda que a covid cambiou todo iso. “Cada clase consiste en exercicios de quecemento, forza, exercicios con aparellos e creación de figuras e remata con estiradas e relaxación profundas”. O certo é que moitos chegan a ZŌ cos ollos postos nas teas, pero Davinia di que “terminan mirándoas de esguello durante todo o ano porque supoñen o dobre de esforzo e moita máis forza e destreza, e non son tan agradecidas. En dúas ou tres clases xa podes facer algo en calquera dos outros aparellos e na tea custa incluso aprender a subir a ela”.

Insiste en que “é vistosa, pero para min aburrida, porque é máis limitada. Nun trapecio tes dúas cordas e unha barra para xogar e o aro tamén permite facer moitas cousas…”, algo que parece contaxiar o seu alumnado, especialmente o máis novo, “a quen lle encanta todo, especialmente facer pinchacarneiros, xiros… todas as acrobacias aéreas, e tamén os malabares”.

O curso está aberto para público a partir dos 4 anos. Davinia Rico explica que “en ZŌ se coida moito o grupo. Eu teño unha maneira de dar clase moi positiva para eles. Protéxoos e incúlcolles a filosofía do circo, que é a familia, onde se ti caes eu caio. Xérase un espazo estupendo para eles porque están na casa”.

ZŌ Circo – C/ Camariñas, 9, 15002 A Coruña. 691 07 34 01 – @zo15002

Texto: Toni Martín // Fotografías: Bruno Rodríguez (@brod_a_secas) // Vídeo: Sabela Freire